LA CUCINA IN VERSI a cura di Eugenio Maria Gallo
PINNUI 'E CUCINA
Zi zia me dicìa ch'a medicina,
chilla cchjù bbona e cchjù putente,
chilla chi fa miracui alla ggente
è fatta suu ccù pinnui 'e cucina!
Ed illa chi de capu era pussente
e ppé sse cose avìa spertizza fina,
'mpece de supposte e d'aspirina
ppé ugne acciaccu avìa 'nu spediente.
Era 'na spezerìa chilla cucina,
duv'illa jìa frugannu ccù 'na manu
'ntr'a 'nsalatera 'e vitamine chjina:
ppé llu ventre: suu ogliu paisanu;
ppé lla tussa: sciruppu d'a cantina;
ppé lu jatu: pan'e spagna 'e Dipignanu.
